الشاعر سعد علوش ((( المرعــــب ))) في سطـــــور

شخصيتي من غرابتها وطيبتها *** كن الزمن في تحدّي بينه وبيني

هو سعد بن جابر بن علوش الهاجري ( المرعب ) صاحب المشاعر والاحاسيس الجميلة والصادقة, الذي يُعد من اهم شعراء جيله, والذي يتميز بشاعريته وبكتابة قصائده باختياره للكلمه وانتقاؤه لها وبقوة التعبير وصدق المشاعر خاصة فأن كل ما يدور في ذهنه ويكمنه قلبه تفيض به حنجرته وارى ان ذلك هو سبب نجاحه, فنجاحه في تميزه وابداعه, لذلك يصعب علينا مقارنة سعد بغيره فسعد هو ذاته سعد.

ومهما قمنا بوصفه فلن نفي بحقه, ولو اردنا قول .. ابداع .. ثقة .. عاطفة .. صدق .. تجدد .. فكر .. تميز .. فكل ذلك سيذكرنا بسعد بن علوش, أعني بذلك انه شاعر متنوع ومتمكن وله مكانته في ساحة الشعر حتى ولو كان هناك من يحاول التقليل من مستواه او ( تهميشه ) على الساحة فبالرغم من ذلك ستبقى مكانته كما هي في نظر عشاقه ومحبيه.

وإن كان سعد قد اخطأ بشيئا ً ما واصبح ممسكا ً عليه فقد أتذكر إنه قال :

إن كنت أنا أخطي شي طبيعي لأن أنا ماني نبي

محد ٍ عصمه الله من الاخطاء يكون الانبيا

فعلا ً انا اخطي بس ضوّي ماتشب إلا إحطبي

اطمح و لولا الليل محد ٍ شاف فايدة الضيا

وها هو يتعجب من حسّاده قائلا :

كل ما اتعثّر قلت في نفسي وانا أمس إشنبي :

يا كم على الدنيا فقير ويحسدونه اثريا !!

ورغم ما يوجّه له اعداءه من شتم ٍ وسب .. يقول لنا :

لأن عندي درايه بالزمن و معروف

السـّـوي اللي يسبـّـه شخص ما هو سوي

تدري ليه اتبسم لا شتموني ضعوف

لأن شتم الضعوف يدلل اني قوي

وان كانت هذه الزمرة مخلوقه للعداوات فسعد يقول :

حنا خلقنا للرذيله .. فضيله

نصلّح اغلاط الزمن بابتسامات

اما الشطر الوحيد الذي لم اقتنع به نهائيا :

من اول تنبح كلاب او قافلة الاحمل تسير

" و اليوم لا تنبح كلاب او لا تسير القافله "

لأنه يسير و ..!

وهنا يذكّر من اساء اليه :

جيت للدنيا كبير و ابا افارقها كبير

ولا بناشد من مدحني ولا من ذمني

عموما .. لا مجال لمن يسمّيهم بـ ( البقحين ) بمصارحته :

قسم بالله لو ما لي مع اهل الطيبة مبدا

لا انزل نفسي لبقحين خلق الله واصارحها

وان كان ما يحصل له ابتلاء :

لكن مع الله كل بلوى بخيره

انا ذكاي من التجارب رصيدي

" ويش اسوي والحظوظ السود تامر .. تنهي " حتى حظه الأسود غائبا عنه :

اخذيني الشاعر اللي ماصدق حظه

لاقلت: ياحظ وينك ؟ قال: يا ويني ؟

فعلاً هو شاعر مبدع .. :

لالا .. أنا مخلوق مبدع ما يحب وما يبي

إلا يقول : الاذكيا سبّة رسوب الاغبيا

ومما قال بالفصحى :

هل علِمت عن جنوني يا آنف

انّي لَمجنون النشاز المجيدي

لبّيك يا سلكا ً حمِلت الفضائل

أوعِز لِصاحبك بتحرير قيدي

ويكتشف من اسباب تولد الحرارة سبب غفل عنه العلماء :

شبّيت في قلبي وانا بطبع البرود مطبّعه

وكذاب من قال الحرارة من نتاج الاحتكاك

هذا انت في لوس انجلوس متقبع لك بقبعة

وانا على عرق وخفوقي يابعد عمري معاك

ومن حِكَمه :

من الذكاء انك تسوّي نفسك أحياناً غبي

بس الغباء إنك تذيكالك على ناس أذكيا

يرى انه لايوجد داعي للتفاخر بكثرة الاصدقاء :

ماهو فخر في سنة تعرف لك مية صديق

الفخر ؟ تتعرف بصديق .. لمية سنة

نوعاً ما هو مرهق والسبب :

تعبت لأني من اهل الطولات صعبين المراس

اللي يحبون الوفا ولا يحبون الغدر

سعد والأغبيا :

انا افكر كيف ازيل المنحدر من الاساس

والاغبيا لاهين في لذة صعود المنحدر !!

ويصف الدنيا .. :

إيـه .. والدنيا مساكن ورحلة واغتراب

والغلا بالوقت هذا مميز بالعيوب

مقتطفات غزلية :

لا ارى لا اسمع لا اتكلم :

اغليه .. يعني اعشقه .. اعشقه .. يعني اموت فيه

يعني انا ميت مع عشقه ومرتبة الشرف

امشي معه من غير لا أين .. ولا كيف وليه

من حيث ما يجرفني .. اغمض عيوني و انجرف

إن قال: لا .. أقول: لا .. إن قال: إيه .. أقول : إيه

ماعرف ماسمع ما أرى .. ما أرى ماسمع ماعرف

لا فض فوه :

لا بث رقمه شاشة الجوال .. أتوه

و اقول : يا ربي تبارك ساعته

جوّالي ليامنه دق وقال: الوه

تذوب اذانيي على سماعته

لبيه يا كلماته .. ولا فض فوه

أموت في ضحكته و استمتاعته

من كثر ما احبه .. احب امه وابوه

بالمختصر .. احبهم جماعته

احبه كثر .. :

احبه كثر ما شفت الخيانة في عيون اصحاب

واحبه كثر ما عقول الدواهي تحسب حسابي

واحبه كثر ما قفـّى عن عيوني بدون اسباب

و كثر ما املى له اكواب الغلا و ينثـّر اكوابي

لحظة البكاء :

فإن غبت يانفر العقل واشتياقه

ماني براغب بعد خوتك خوّه

ببكي على زول عشقته عشاقه

وترى البكا للاقويا .. زود قوة

فإن شفت ابن علوش يبكي فراقه

ترى محادير الجبل من علوه

ةةةةةةةةةةةةةةةةةةةة

وقد اخترت لكم هذه القصيدة القريبة إليّ

وقـد تكفي عن قراءة الموضوع بأكمله !!!

يقول سعـد :

كل حاجه يانبيله في انتظارك ..

الوطن .. والناس .. وانا في انتظارك ..

والطريق العام .. والباب الرئيسي .. والممر .. وقبضة السلم ودارك

كل ابونا يانبيله بانتظارك ..

،

لو تشـوفيني شلون امشي ويديني في جيبي .. انا و أحزاني وطيبي

كان مـاخذتي قرارك ..

كان مارحتي وقلتي ترى .. مانت بحبيبي

،

ياخســاره قلبي المظلوم والا يا انتصارك ..

رحتي واخذتي معاك ابسط تفاصيل الحياة

يامزعلة البنات .. سحقا لكل البنات ..

انا ميت فيك .. ايش ميت فيك .. !! انتي فيك حتى الموت مات

،

ياجنـــونك .. ياانتشــــارك ..

مريّ بشارعك الاول يـ الغلا الاول .. وطوفي بس / شوفي

من وقف على عيونه في انتظارك

من بعد ماخنتي وخانوا كثير احباب يوفي

هم هم رابطه جمهورك المتعصب لطله نهارك

انا .. وطيور القفص .. والباب واشجارك .. وجارك

انتي ام الحسن ..وام العاطفه ..وحنا صغارك

فلا تلومينا اليامنا وقفنا بانتظارك ..

،

اطغي .. اطغي .. خلي الغابات تتسلف خضارك ..

بس تترك اصفرارك لـ ابتسامات المجامل ولوقارك

واتركي لعشاقك الموتى حمارك .. او بالاحرى احمرارك

،

لاتلومينا مجانينك .. نحبك

لا طغيتي .. لازعلتي .. لاحكيتي .. لامشيتي

انتي مسكينه ومظلومه .. ومعذوره ..لامنك نسيتي

لانك انتي اللي فقط ماشفتي نفسك لاحكيتي

لانك انتي اللي فقط ماشفتي نفسك ليا مشيتي

،

يادمــارك

ياوقوف العالم الثالث على شُرفة زرارك

مادريتي ؟ !!

طيب ادري يانبيله كانك اليا الحين فعلا مادريتي

انتي اكبر مشكله تواجه الشعب الكويتي

انتي مثل الظلم والإجحاف بس انتي لئيمه

هم طبيعتهم عدائيين بس انتي رحيمه

مابدر منك جريمة ..

انتي بالفطرة بدون سلاح ومقاتل جريمة

وانا بالفطره .. احبك ياعظيمه

بذبولك .. وانصهارك .. وازدهارك .

يــــانبيله ..

انا حاليا ترى ماني [سـعـيـد] غايب وروحي /جوارك

ماعرف للعيد يوم ... وماعرف لليوم عيد

انقذيني .. كل ماوزني نقص حبك يزيد

انقذيني .. صرت اكلم نفسي ونفسي تعيد

،

كنّا اول في انتظارك

انا وطيور القفص والباب واشجارك وجارك

كلهم راحوا وملوا ..

كلهم راحووا وخلوني لحالي .. في انتظارك

انا حاليا وحيد .. انا حاليا معيد .. لامزيد ولاجديد

الا اني اسولف مع الاخ انتظارك

عند دارك

على كرسي انتظارك اجلس انا وانتظارك في انتظارك

سـعـد بن عـلـوش الهاجـري

هذا الموضوع اهداء الى اخوي ((( الأصيــل )))

واتنمى اني مااطولت عليكم

اقتباس :

الحديث عن مثل هذه القامه لايمل
تفاصيل وقراءات في شعر السعد
اجدت ياأخي في هذا النقل
لاعدمناك

يعطــــــــــيك العافـــــــــيه

شاعر لاتملك امامه الا التصفيق بلا توقف

مهما قلت عن سعد علوش فهو قليل في حقه

بحق يعتبر مدرسة شعرية رغم قصر تجربته مقارنة بالعديد من الشعراء

شكرا لك على ماسطرت هنا اخي عن هذا الشاعر العملاق

سعد علوش

سجلني من المعجبين

بابداعه واجمل ماسمعت له

قصيد الباقيات الصالحات هذه القصيده

قصيره ولكن اقل مايقال عنها انها روووووووعه

» الشاعر عبدالله البيضاني يتراجع عن قرار الإعتزال